Gjykata – “Drejtësia sportive është e ndryshme nga ajo penale, ka vazhduar më tej presidenti. Ajo sportive ka qenë e detyruar të marrë vendimet në një kohë të shpejtë, në një periudhë kur kishte edhe një fushatë negative kundrejt Juves, të cilën e urrenin aq shumë. Në fund të procesit penal të pandehurit rezultojnë të jenë thuajse të pafajshëm. E di që do të jetë e vështirë që të kthejmë pas atë që na është hequr, por ne do ta kërkojmë këtë me zë të lartë. E kaluara është e kaluar dhe duhet të na shërbejë vetëm për të bërë mirë në të ardhmen”.

Merkato – “Nuk do të blejmë asnjë në janar: konfirmoj atë që ka thënë administratori Blank, do të shikojmë perspektivën për në qershor”. Kështu flet Koboli në lidhje me merkaton bardhezi. “Nëse nuk ndodh diçka e jashtëzakonshme, ne nuk do të blejmë asnjë dhe do të kërkojmë të stabilizojmë xhevahiret e shumta që kemi në grup, ngaqë të shumtë janë ata që po rikthehen nga dëmtimet”.

Champions – Si Trezege dhe Bufon “me siguri që qëndrojnë me ne”. Presidenti bardhezi flet për merkaton e janarit, por nuk harron objektivat e skuadrës në këtë vit të ri. “Kampionati është i rëndësishëm, por do të doja të ecnim sa më përpara në Champions”, thotë Koboli Xhilji, duke zbuluar ëndrrën e tij dhe të gjithë tifozëve. Këtë vit, me finalen që do të luhet në Romë, gjithçka do të ishte fantastike. Si në 1996-ën kundër Ajaksit. E kaluara që rikthehet. “Edhe unë do ta doja finalen e Romës: e dëshiroj shumë dhe e duan edhe futbollistët. Më 25 shkurt kemi një ndeshje shumë të vështirë ndaj Çelsit, shtoi ai, por kampionët e mëdhenj stimulohen nga ndeshje të tilla. Unë do t‘i mbaja mbi shpatulla të gjithë tifozët drejt Romës, por varet nga skuadra dhe pak nga fati”.

Momentet e paharrueshme – Pas tre vitesh në drejtimin e Juventusit, Koboli Xhilji bën një bilanc dhe provon të rrëfejë momentet e paharrueshme. “Dita e parë në drejtimin e klubit, nuk e mendoja dot se përballeshim me kaq shumë vështirësi. Pas 10 ditësh iku edhe Kapelo. Rënia në serinë B, ngjitja në Serinë A dhe dy ndeshjet e fituara ndaj Realit të Madridit janë të paharrueshme”.

Andrea Anjeli ka rrëfyer se ëndërron të shohë Lionel Mesin me fanellën e Juventusit. Nga kolonat e gazetës “Tuttosport” lajmi është përhapur shumë shpejt, duke gjetur edhe mbështetjen e tifozëve. Blerja e yllit argjentinas është shumë e vështirë, por jo plotësisht e pamundur. Nuk duhet harruar se në të kaluarën, Barcelona ka shitur Diego Armando Maradonën dhe pak vite më vonë edhe Ronaldon.

Strategjia

Ndoshta nuk do të jetë e nevojshme që në arkat e klubit katalan të paguhet shifra e plotë prej 150 milionë eurosh, të parashikuara në klauzolën për prishjen e kontratës. Gjithsesi, është e detyrueshme derdhja e gjysmës së kësaj shume (75 milionë euro). Për më tepër, nuk duhet harruar se rroga e Leo Mesit është e lartë dhe kjo do të bënte që edhe lojtarë të tjerë të Juves të pretendojnë rritje rroge. Në teori, shifrat financiare janë shumë të larta dhe kundër politikës së ndjekur nga klubi deri më tani. Me fjalë të tjera, pengesat janë të shumta. Por, ëndrra nuk mund të braktiset…

Sakrifica

Bardhezinjtë kanë studiuar disa strategji për të marrë shërbimet e “Pleshtit”. Megjithatë, në realitet, taktika më e mundshme është vetëm një: shitja e futbollistit që ka më shumë oferta, Xhixhi Bufon. Portieri është pjesë e historisë së klubit, edhe sepse pranoi të luante në Serinë B vetëm pak javë pasi u shpall kampion i botës. Hipoteza e largimit të “gardianit” ka ndarë edhe tifozët juventinë. Pas një sondazhi, 52 për qind e pjesëmarrësve nuk preferojnë ta shohin larg skuadrës, as në këmbim të Mesit. Ndërsa, pjesa tjetër (47.5 për qind) joshen nga ideja e blerjes së 21-vjeçarit.

Fondet

Në të gjithë këtë situatë nuk kanë munguar as idetë për mbledhjen e fondeve. Grumbullimi i parave drejtpërdrejtë nga xhepat e tifozëve ka qarkulluar në forumin “Veçhiasignora.com”, nëpërmjet një sondazhi. Duke llogaritur që Juventusi numëron afro 15 milionë tifozë, sikur vetëm gjysma e tyre të kontribuonte me 5 euro, totali i shifrës së mbledhur është një ndihmë e madhe për klubin: 35 milionë euro. Nëse realisht paratë e grumbulluara do të shërbenin për të blerë Leo Mesin, 77.5 për qind e atyre që morën pjesë në sondazh janë të gatshëm të fusin dorën në portofol. Ata që besojnë se lojtarët duhet t‘i paguajë klubi pohuan se do të “dhurojnë” të paktën nga 1 euro, por nuk mungojnë as tifozët, të cilët kanë filluar të kursejnë nga 200 euro për këtë kauzë. Kjo cilësohet si një mënyrë për të ndihmuar skuadrën që të mos ndihet e detyruar të shesë Xhixhi Bufon. Numrin 1 në botë mes shtyllave dhe numrin një në këtë sport, do të ishte më bukur po t‘i shihje përkrah njëri-tjetrit me fanellën bardhezi.

Bomberat Amauri-Del Piero, ndjekja e Interit, ëndrra Champions. Presidenti i Juventusit, Koboli Xhilji, shikon një bilanc pozitiv për bardhezinjtë në 2008-ën. Po ashtu, ai fikson objektivat për sezonin e ardhshëm dhe mbron gjyqtarët pas polemikave të javës së fundit të Serisë A. Një vit sigurisht i kënaqshëm për bardhezinjtë, me rikthimin në mënyrën më të mirë në Evropë (me vendin e parë në grup në Champions dhe fitoren e dyfishtë me Real Madrid) dhe kandidatura si ndjekësja e parë e Interit të Murinjos në sezonin në vazhdim. “Ka qenë një vit pozitiv për Juven, me një pjesë të parë, në të cilën jemi kualifikuar në Champions League dhe në pjesën e dytë, në Serinë A, që na gjen gjashtë pikë nga kreu”, shprehet Koboli Xhilji. Mirë për të kaluarën, por t‘i hedhim një sy edhe së ardhmes së afërt: “Duam të bëjmë figurë të mirë në Champions dhe të luajmë për titull deri në ndeshjen e fundit, pa harruar kupën e Italisë”, thotë presidenti i Juves për radion “Sky Sport 24″. Për 2009, Koboli Xhilji uron edhe një parakalim të Interit. “Shpresoj që një ditë Juventusi të dalë në vend të parë. Zikaltrit nuk kanë pasur ende një episod kundër? Dua të them se vitin tjetër do t‘ju ndodhë, kjo, bazuar në një llogari normale të futbollit”. Nuk mungojnë edhe zërat e merkatos. Por Koboli duket kategorik: “Merkato? Në janar do të rikuperojmë kampionë të mëdhenj, të cilët kanë qenë të dëmtuar për një periudhë të gjatë dhe besojmë se nuk do të na duhet as të blejmë dhe as të shesim. Seko e Blank po shikojnë ndonjë blerje për në qershor, por tani do të rikthehen Trezege, Zebina, Bufon, kemi rikuperuar Zanetin e Poulsenin. Do të jetë një skuadër e strukturuar mirë për fillimin e shkurtit ndaj Çelsit, ku kemi 50% të shanseve për të kaluar turin”. Koboli më pas vlerëson Amaurin, investimin më të madh të merkatos bardhezi, i cili me 11 golat e tij ka bërë të mos ndihet mungesa e gjatë e David Trezegesë: “Nuk mund të zgjedh tjetër veç Amaurit, si juventini i 2008-ës. Është përmirësuar ndeshje pas ndeshjeje, është shndërruar në një yll të Juventusit, por edhe i futbollit italian. A do të bëhet italian? Do të ishte mëkat nëse nuk do të bëhej”. Për ardhjen e Bekhamit, presidenti i Juves është ironik: “Milani ka projektin e tij të imazhit që e njohim, ne kemi bërë operacionin e stadiumit të ri”.