Lajme Online Shqip » izraeli

IZRAELI NIS HETIME PËR PËRDORIMIN E ARMËVE ME FOSFOR TË BARDHË NË GAZA

DashiC — Wed, 21 Jan 2009 17:23:36 +0000

Hetimet ushtarake izraelite në lidhje me përdorimin e fosforit të bardhë gjatë ofensivës në Gaza po përqëndrohet në një incident ku 20 predha që përmbanin këtë element shpërthyen në një zonë të populluar, thuhej në një gazetë.
E përditshmja “The Haaretz” njoftonte se incidenti ndodhi në veri të Gazës, në qytetin Beit Lahiya.
Fosfori i bardhë është një substancë zjarrvënëse e cila digjet fuqishëm dhe për një kohë të gjatë. Përdoret për të krijuar perde tymi, por mund të përdoret edhe si armë duke prodhuar djegje ekstreme nëse bie në kontakt me lëkurën.
Dy fëmijë palestinezë humbën jetën dhe 14 persona të tjerë më 17 janar, kur disa predhe izraelite goditën një shkollë të përdorur nga OKB-ja në Beit Lahiya, njoftuan burime mjekësore.
“Haaretz” njoftonte se një brigadë rezervistësh paraushtarakë goditën zonën me rreth 20 predha me fosfor të bardhë.

GAZA – HAMASI KONFIRMON HUMBJEN E 48 MILITANTËVE GJATË OFENSIVËS IZRAELITE

DashiC — Mon, 19 Jan 2009 14:38:18 +0000

Hamasi konfirmoi sot se vetëm 48 militantë kishin humbur jetën gjatë ofensivës izraelite në Rripin e Gazës.
”Njoftojmë popullin se gjatë ofensivës izraelite kanë humbur jetën vetëm 48 militantë”, deklaroi në një konferencë shtypi Abou Oubeida, zëdhënës i krahut ushtarak të Hamasit.
Izraeli konfirmoi se ishin vrarë 500 militantë të Hamasit gjatë ofensivës izraelite që u ndërmor më 27 dhjetor. Luftimet u ndërprenë të dielën.
Zëdhënësi konfirmoi gjithashtu se ”kapaciteti i Hamasit për të hedhur raketa kundër Izraelit nuk ishte ulur, ndërkohë që objektivi kryesor i ushtrisë izraelite ishte ndërprerja e hedhjes së predhave dhe raketave kundër territorit izraelit”.

LUFTANIJET IZRAELITE KTHEJNE MBRAPSHT NJE ANIJE ME NDIHMA PER GAZEN

DashiC — Thu, 15 Jan 2009 12:22:48 +0000

Luftanijet izraelite detyruan sot që një anije, që lundronte me një flamur grek dhe që transportonte ndihma humanitare për palestinezët në Gaza, të kthehej pa arritur të çonte ndihmat në vend, deklaruan sot disa aktivistë humanitarë.
Aktivistët që ndodheshin në anije deklaruan se po ktheheshin në Qipro pasi gjatë natës, në ujërat ndërkombëtare, kishin patur përplasje me anijet izraelitete, cilat kishin kërcënuar se do të hapnin zjarr nëse anija nuk kthehej.
“Anija, në të cilën ndodheshin 21 persona u zbulua nga luftanijet izraelite rreth 100 milje në verilindje të brigjeve të Rripit të Gaza”, deklaroi Huwaida Arraf, njëra prej organizatorëve të misionit të lëvizjes “Çlironi Gazën” me qendër në SHBA.
“Luftanijet izraelite u afruan shumë pranë dhe na kërcënuan se do të hapnin zjarr nëse anija vazhdonte drejt Gazës”, deklaroi Arraf.
“Na rrethuan katër luftanije izraelite dhe kjo na e vështirësoi së tepërmi lundrimin në drejtimin e nisur, ndërkohë që na komunikuan se do të përdornin të gjitha mjetet e mundshme për të na mbajtur larg brigjeve të Rripit të Gazës”, shtoi ajo.
Zëdhënësja e misionit, Karin Pally deklaroi se personat që ndodheshin në anije vendosën të ktheheshin.
Izraeli detyroi dje një anije iraniane, që transportonte ndihma humanitare për palestinezët në Gaza, të kthehej.
Të dyja anijet kishin plan të ndalonin drejtpërdrejt në portin e Gazës dhe jo të kalonin përmes pikave të kontrolluara nga Izraeli dhe nga Egjipti, në të dyja pikat kufitare të Gazës, ndërkohë që në anijen e nisur nga Qipro ndodheshin politikanë, punënjës të ndihmave dhe mjekë.
Bllokada detare izraelite në Gaza është intensifikuar pas fillimit të sulmeve më 27 dhjetor që kanë si qëllim largimin e militantëve të Hamasit nga enklava.
Lëvizja “Çlironi Gazën” nisi dërgimin e rregullt të ndihmave drejt Rripit të Gazës nga Qipro gjatë muajit gusht të vitit të kaluar.

BAN KI-MUN NË VIZITË ZYRTARE NË IZRAEL

DashiC — Thu, 15 Jan 2009 12:19:41 +0000

Sekretari i përgjithshëm i OKB-së, Ban Ki-Mun mbërriti për një vizitë zyrtare në Izrael, në kuadër të një turi në Lindjen e Mesme në përpjekje për t’i dhënë fund dhunës në Rripin e Gazës.
Ban do të takohet me ministren e Jashtme izraelite, Tzipi Livni dhe më pas me kryeministrin Ehud Olmert dhe presidentin Shimon Peres.
Nesër, Ban do të shkojë në Ramallah dhe Cisjordani për t’u takuar me presidentin e Autoritetit Palestinez, Mahmud Abas

Hamas pranon armepushimin

Mimoza A — Wed, 14 Jan 2009 16:46:30 +0000

Hapet nje mundesi per arritjen e paqes ne Rripin e Gazes. Hamas i ka dorezuar negociatoreve egjiptiane pergjigjen per planin e armepushimit.
Levizja fondamentaliste Hamas ka pranuar propozimin egjiptian per armepushimin, pas tre dite konsultimesh ne Kajro mes Hamas dhe shefit te Sherbimeve Sekrete egjiptiane, Omar Suleiman.
“Egjipti, te enjten do te informoje Izraelin per vendimin e Hamas”, tha nje burim pas takimeve.

Intensifikohen luftimet në Gaza

Mimoza A — Tue, 13 Jan 2009 10:57:17 +0000

Me gjithë përpjekjet për armëpushim sipas të dhënave të banorëve luftimet në Qytetin e Gazës janë intensifikuar. Ka njoftime se trupat izraelite ka hyrë më thellë në qytet.
Sipas Al Jazeera, trupat izraelite e kanë rrethuar Qytetin e Gazës nga të gjitha anët dhe po përparojnë. Banorët bënë fjalë për një nga netët më të këqija të sulmeve.
Ndërkaq, Izraeli ka përgënjeshtruar pohimet e Hamasit se janë shkatërruar dy tanke izraelite.
Burimet mjekësore palestineze thonë se rreth një e treta e më shumë se 900 palestinezëve që kanë vdekur gjatë kësaj ofensive janë fëmijë.
Por kryeministri izraelit, Ehud Olmert thotë se militantët palestinez do të fillojnë ta ndjejnë atë që ai e quajti grushti i hekurt i Izraelit – përderisa Hamasi vazhdon të hedhë raketa ne Izrael.
Këshilli i Sigurimit i Kombeve të Bashkuara mblidhet sot sërish për këshillime mbi gjendjen në Rripin e Gazës.
Sekretari i Përgjithshëm i OKB-së Ban Ki Moon u bëri sërish thirrje izraelitëve dhe palestinezëve për t’i dhënë fund menjëherë dhunës.
Ban do të udhëtojë sot për një vizitë njëjavore në rajon për t’i shtyrë izraelitët dhe palestinezët drejt bisedimeve të drejtpërdrejta.
Stacione të vizitës së tij janë Egjipti, Jordania, Izraeli, Ramallahu, Libani, Siria dhe Kuvajti.

Numri i viktimave palestinezë ka arritur në 900

Mimoza A — Mon, 12 Jan 2009 14:32:48 +0000

Zyrtarët e sektorit të shëndetsisë në Gaza thanë se të paktën 895 palestinezë janë vrarë gjatë kësaj ofensive, për të cilën Izraeli thotë se ka për qëllim të ndalojë ekstremistët e Hamasit që të godasin Izraelin jugor me raketa. Sulmet e palestinezëve me raketa vazhdojnë, edhe ndërsa Izraeli dërgon njëri rezerviste në Gaza.

Një delegacion parlamentarësh europianë arriti të hynte sot nëpërmjet Egjiptit në Rripin e Gazës

Andi Bega — Sun, 11 Jan 2009 18:21:46 +0000

Një delegacion parlamentarësh europianë arriti të hynte sot nëpërmjet Egjiptit në Rripin e Gazës, territor palestinez objekt që prej më tepër se dy javësh i një ofensive të përgjakshme izraelite, njoftoi shefja e këtij misioni.
Këta parlamentarë, të cilët janë tetë, përdorën pikën e kalimit në Rafah, mes Egjiptit dhe Rripit të Gazës, ku pritet të qëndrojnë deri të martën për të vlerësuar situatën, shpjegoi zëvendëskryetarja e Parlamentit Europian, italiania Luisa Morgantini, në një mesazh elektronik dërguar AFP-së.
Gjatë qëndrimit të tyre, tetë deputetët, të cilëve u shtohet një senator italian, do të vizitojnë veçanërisht disa kampe të refugjatëve dhe spitale të Gazës bashkë me anëtarë të agjencisë së OKB-së për ndihmën për refugjatët palestinezë, Unrwa.
Kur të kthehen në Strasburg, ata do t’i japin llogari Parlamentit Europian për vizitën dhe do të mbajnë një konferencë shtypi, shtoi Morgantini.

NDËRPRITEN PËRSËRI PËR TRI ORË SULMET IZRAELITE NË GAZA

Andi Bega — Sun, 11 Jan 2009 12:55:03 +0000

Ushtria izraelite njoftoi sot një ndërprerje tjetër tri orëshe të operacioneve të saj ofensive në Rripin e Gazës për arsye humanitare, por disa shpërthime janë dëgjuar pavarësisht nga pushimi.
“Sulmet izraelite janë ndërprerë duke filluar nga ora 09:00 GMT për tri orë”, i deklaroi AFP-së një zëdhënës ushtarak.
Disa shpërthime megjithatë janë dëgjuar në Gaza dhe në veri të territorit palestinez gjatë kësaj ndërprerjeje. Sipas disa dëshmitarëve, disa të shtëna artilerie ka patur në lindje të Gazës dhe në Jabaliya.
Izraeli njoftoi se i ka ndërprerë që të mërkurën bombardimet në Rripin e Gazës tri orë në ditë për të lejuar furnizimin e popullsisë me ndihma, duke njoftuar gjithashtu se do t’i kundërpërgjigjej të shtënave.
Sipas disa dëshmitarëve, tanke izraelitë kanë hedhur predha në Rripin e Gazës gjatë ndërprerjes së luftimeve.

TRUPAT IZRAELITE VRASIN VRASIN 10 PALESTINEZË TË ARMATOSUR NË QYTETIN E GAZËS

Andi Bega — Sun, 11 Jan 2009 11:33:59 +0000

Ushtarët izraelitë vranë sot 10 palestinezë të armatosur gjatë përleshjeve në qytetin e Gazës, bënë të ditur zyrtarët palestinezë të shëndetësisë.
Përleshjet në anën jugperëndimore të qendrës më të madhe të populluar në Rripin e Gazës tregojnë se Izraeli po intensifikon ofensivën e tij dyjavore. Më parë trupat zhvillonin përleshje në periferi të zonave urbane të Gazës.