Lajme Online Shqip » Inter

Murinjo: Dua një përforcim

Andi Bega — Thu, 07 Jan 2010 16:37:18 +0000

Zikaltrit fitojnë mes polemikave me Kievon. Baloteli, akuza tifozëve veronezë.
Interi e nis vitin 2010 me fitore dhe shpallet kampione e dimrit në Serinë A italiane. Zikaltrit fituan 1-0 në fushën e Kievos falë një goli të Mario Balotelit në minutën e 12. Kur mbetet edhe një ndeshje për t’u luajtur nga faza e parë, skuadra e Zhoze Murinjos ka grumbulluar 42 pikë. Takimi, i cili hapi javën e 18 të kampionatit, është luajtur në orën 12.30. Një orar që Liga Italiane e Futbollit e ka justifikuar me afrimin e publikut aziatik: por, duke parë mënyrën sesi rrodhi loja, do të ishte më mirë që imazhet mos të kishin arritur asnjëherë në këtë kontinent.

Fusha, në kushte jashtëzakonisht të këqija në stadiumin “Bentegodi”, ua ka vështirësuar punën dy skuadrave. Rrallë mund të shihje dy pasime radhazi dhe në përgjithësi ndeshja kishte shumë faulle, thyerje dhe aspak spektakolare. I vetmi që i ka dhënë pak cilësi përballjes ishte holandezi Shnajder me manovrat e tij. Një sfidë e tillë mund të përcaktohej vetëm nga një episod: rasti më i mirë u paraqit në formën e një kundërsulmi të shpejtë të Interit, kur kronometri tregonte 12 minuta lojë. Pas një kontakti në zonën zikaltër, ku kapiteni i Kievos, Pelisier pretendonte 11-metërsh, të besuarit e Murinjos dolën shpejt në sulm me treshen Milito-Pandev-Shnajder, duke nxjerrë Balotelin të lirë përballë Sorrentinos: gjuajtja e parë u grushtua nga portieri vendas, ndërsa tentativa e dytë e sulmuesit të talentuar me pasaportë italiane përfundoi në rrjetë.

Pas golit që zhbllokoi rezultatin, ndeshja u karakterizua nga kartonët e shumtë (gjashtë për Interin dhe tri për Kievon), një tjetër pretendim i vendasve për një penallti të paakorduar nga gjyqtari Pierpaoli në minutat shtesë, por edhe nga momentet e frikës, pas një dëmtimi në kokë të Kristian Kivut. Rumuni u dërgua menjëherë në spitalin e Veronës, ku iu nënshtrua një ndërhyrjeje kirurgjikale. Sipas stafit mjekësor të zikaltërve, operacioni ishte i domosdoshëm për të mbyllur frakturën në kafkën e lojtarit.

Në sfidën e luajtur dje, mund të veçohen edhe debutimi i Arnautoviç me Interin në Serinë A dhe lamtumira e Patrik Vieirasë, i cili përshëndeti shokët e skuadrës dhe tifozët, pasi sipas të gjitha gjasave do ta vazhdojë karrierën te Mançester Siti i Roberto Mançinit. Largimi i mesfushorit francez u konfirmua nga Murinjo, i cili deklaroi se skuadrës i nevojitet edhe një përforcim. “Jam i lumtur, ndeshjet e fituara në këtë mënyrë janë ato që i dhurojnë trajnerit buzëqeshjen. Skuadra paraqiti karakterin e saj në fushë: në futboll, diferenca bëhet nga personaliteti i lojtarëve dhe sot ishim perfektë”, deklaroi tekniku luzitan.

“Përpara kësaj sfide kishim probleme me kontingjentin dhe morëm pikët maksimale falë grintës që shfaqëm. Vieira? Ai zhvilloi një ndeshje të jashtëzakonshme. Nuk mund të na dhuronte një lamtumirë më të mirë se kjo. I uroj fat në aventurën e tij të re dhe mund të them se do të më mungojë një lojtar i tillë. Për mendimin tim, Patrik do të luajë në Angli. Më mungon një lojtar në mesin e fushës, por nuk kam të drejtë t’i kërkoj asgjë klubit. Bëj maksimumin me lojtarët që kam në dispozicion. Faulli me dorë i Kuarezmës në të 95-n në zonë? Jo, m’u duk sikur topin e preku me kokë Jepes…”. Të gjithave këtyre i shtohet edhe zemërimi i Balotelit, që në fund të ndeshjes ka akuzuar publikun veronez. “Tifozët në Verona ma shpifin sa herë që luaj në këtë stadium”, tha sulmuesi, duke iu referuar kontestimeve të vazhdueshme.

Interi, kampioni i dimrit

Andi Bega — Mon, 21 Dec 2009 15:26:16 +0000

Ka mjaftuar nje gol i Eto’o qe Interi te mposhte 1-0 Lazio-n ne “San Siro” dhe te coje ne 8 pike diferencen me Milanin e vendit te dyte qe ka 1 ndeshje me pak. Kampionet e nisen mire ndeshjen, por nuk arriten te mbajne te njejtin ritem pas golit te avantazhit ne minuten e 14-te me kamerunasin Eto’o.

Nga ana tjeter, Lazio nuk ka patur saktesi ne tentativat e veta sulmuese. Interi e mbyll vitin 2009 ne krye te Serie A dhe per me shume pa asnje humbje

“Nëse Interi fiton Champions-in, të merremi me kinemanë shqiptare”

Andi Bega — Fri, 18 Sep 2009 15:41:55 +0000

Kështu ironizojnë gazetat spanjolle trajnerin e zikaltërve, Zhoze Murinjo

Sukseset modeste të kinematografisë shqiptare kthehen në një batutë ironizuese të shtypit spanjoll në drejtim të trajnerit të Interit, Zhoze Murinjo. Gazetat iberike, në mënyrë unanime përshëndetën dje “leksionin e futbollit” që Barcelona i dha Interit të mërkurën në “San Siro”. “El Mundo Deportivo” theksonte se italianët u mbyllën në mbrojtje, ndërsa djemtë e Pepe Guardiolës luajtën një futboll spektakolar, edhe pse u mungoi goli dhe fitorja. “San Siro, pa klasin dhe stilin e kampionit”, titullonte e përditshmja tjetër sportive katalanase “Sport”. Ajo nënvizon se Barça ishte “shumë më superiore se Interi i Murinjos dhe Eto‘osë”. Gazetat spanjolle kritikojnë strategjinë ultradefensive të Interit. “Abc” flet për “katenaçio totale” dhe për gabimet e arbitrit, në veçanti penalltinë e padhënë në minutën 74 për faullin e Stankoviç, që i privoi Barcelonës fitoren. “As” nënvizon “kualitetin spektakolar të kësaj skuadre, të cilën Guardiola e drejton në mënyrë harmonike”. Dhe pastaj shton: “Interi nuk ka Mesi dhe kjo është një diferencë e madhe”. Për gazetën katalanase, “më e keqja e ndeshjes ishte trajneri interist, Zhoze Murinjo, nga i cili pritej një qëndrim më i guximshëm, ngaqë Interi luante në San Siro”. Me portugezin kapet edhe “El Mundo”, në një artikull të titulluar “Vrasësi i futbollit”. “Futbolli, shkruante ajo, është sporti që u jep më shumë suksese atyre që i meritojnë më pak. Mjaft Murinjos, mjaft iluzioneve. Është matematikisht e pamundur, që lojtarë si ata të Interit, të mbuluar nga miliona, të luajnë kaq keq siç bënë të mërkurën. Për më tepër, shkruan gazeta, ata i drejton një person, që pretendon se është një strateg i pagabueshëm dhe, i cili është i aftë të thotë se mund të kontrollojnë ndeshjen pa top”. Pikërisht këtu vjen edhe ironia e “El Mundo”-s, sipas së cilës: “Nëse Interi do të fitojë Champions, do të jetë më mirë ta harrojmë futbollin dhe t‘i dedikohemi shqyrtimit të sukseseve të kinematografisë shqiptare”.

Por çudia vazhdon. Duhej shpjeguar ajo lojë e mërzitshme e zikaltërve në 90 minuta, duhej justifikuar mungesa e rasteve për gol, që kur luan në shtëpi janë gjithmonë një sinjal i keq. Duhej mbuluar ai 66% i zotërimit të topit kundër 34% të Interit, shifra që diktojnë superioritetin e katalanasve. Prandaj Murinjo ka nxjerrë nga “arkivi” teori nga të tijat: “E pranoj, Barcelona ka kontrolluar lojën, por Interi im në mënyrën e tij ka pasur kontrollin e lojës pa top, që është një meritë e pamohueshme”. “Kontrolli i lojës pa top”, një tjetër perlë e Murinjos, që duket se nuk do të jetë e fundit. “Nuk duhet t‘jua shpjegoj ju italianëve çfarë është kontrolli i lojës pa top, ju e keni shpikur këtë art. Nëse Santon do të kishte shënuar, mund të kishim fituar. Ndoshta nuk do ta meritonim, por do të kishim fituar. Dhe ju italianët, që jeni mjeshtër të cinizmit taktik, tani kritikoni Interin se nuk ka luajtur mirë. Ndërsa unë u bëj komplimente lojtarëve të mi, që kanë luftuar dhe kanë vuajtur kundër një kundërshtari që luan symbyllazi, sepse ka njerëz që kanë punuar prej vitesh bashkë”, përfundon trajneri i zikaltërve

“Barça superiore, por jam i kënaqur”

Andi Bega — Fri, 18 Sep 2009 15:33:55 +0000

Morati

Tek Interi janë optimistë, pavarësisht lojës së dobët të skuadrës në barazimin 0:0 me Barcelonën. Pas ndeshjes së parë në këtë edicion të Champions-it, presidenti Masimo Morati tha: “Momentalisht, skuadra e Guardiolës është superiore. Megjithatë, unë jam i lumtur me atë që paraqiti Interi dhe kam shumë besim te skuadra”. Drejtuesi zikaltër foli edhe rreth pritjes së Zlatan Ibrahimoviç: “Vlerësoj edhe sjelljen e tifozëve ndaj tij”.

Interi beson ne fantazite e Ibrahimovic

Andi Bega — Tue, 10 Mar 2009 15:41:27 +0000

Zlatan Ibrahimovic njihet per besimin e larte ne vetvete. Vetem nje budalla mund te besoje se Interi do te luaje i qete, ne ndeshen e radhes, te “Champions”-it, te merkuren, ne “Old Tratford”. Por edhe perballja mes dy trajnereve, Hoze Murinjos dhe Aleks Fergusonit, pritet te sjelle nje atmosfere elektrizuese. Ibrahimovic po kalon disa momente te mira, sikur te jete pjese e botes se fantazive dhe po mendon se ne “Old Traford” do te shenoje nje tjeter gol spektakolar, si ne Xhenoa. Ndeshja e pare ne Milano perfundoi pa gola, cka e ka lene te hapur kualifikimin. Sipas Murinjos, sulmuesi i i Interit, Hoze Murinjo eshte me i miri ne bote.

Interi kalon në çerekfinale të Kupës së Italisë

Mimoza A — Wed, 14 Jan 2009 12:36:32 +0000

Skuadra e Interit ka kaluar në çerekfinale të Coppa Italia, pasi ka arritur ta mposhtë Genoan me rezultat 3-1 vetëm pas vazhdimeve. Pas barazimit zhgënjyes në Giuseppe Meazza në fundjave kundër Cagliarit, Interit i duhej domosdo një fitore para tifozëve të vet, prandaj trajneri Jose Mourinho inkuadroi në lojë Adrianon dhe Crespon në sulm. Nga ana tjetër Genoa vinte nga një fitore mahnitëse prej 3-0 kundër Torinos, prandaj trajneri Gian Piero Gasperini pushoi disa lojtarë, derisa njeriu kryesor i sulmit, Diego Milito, ishte i lënduar. Në minutën e 20 të takimit ndodhi një vendim kontrovers i gjyqtarit, pasi akordoi një penallti në favor të Interit dhe largoi nga ndeshja me karton të kuq Giuseppe Biavan me pretendimin se ky i fundit kishte ndërhyrë në sulmuesin Adriano. Vetë Adriano mori përgjegjësinë e ekzekutimit të kësaj penalltie, të cilën e mbrojti portieri Scarpi. Deri në pesëmbëdhjetë minutat e fundit të kohës së rregullt nuk u panë gola. Në minutën e 75-të më në fund u mposht portieri i Genoas, Scarpi, ndërsa golashënues ishte Adriano. Genoa barazoi rezultatin në minutën e 79-të kur Marco Rossi shfrytëzoi një gabim të Samuel për ta mposhtur portierin Toldo. Meqenëse edhe takimi i parë në Genoa kishte përfunduar me rezultat 1-1 u deshën vazhdimet për ta përcaktuar fituesin. Në minutat shtesë rezistenca e Genoas u dobësua, duke pasur parasysh edhe mungesën e një lojtari, me ç’rast zikaltërit shënuan dy herë. Cambiasso e kaloi në epërsi Interin (100′), ndërsa Ibrahimovic shoi shpresat e mysafirëve me golin e tretë për Nereazzurët (104′).

Maradona: Me Moratin, do zgjidhja Interin

Mimoza A — Wed, 14 Jan 2009 12:23:41 +0000

Hoze Murinjo dhe Di ego Armando Maradona janë takuar dje në kompleksin stërvitor të Interit dhe janë dukur si dy miq të vjetër. Trajneri i Argjentinës, i shoqëruar nga tre bashkëpunëtorë të tij, ka folur gjatë me teknikun portugez. Murinjo i ka dhuruar argjentinasit një bluzë, ndërsa i ka kërkuar atij një autograf për djalin. Përpara se të largohej nga Apiano Xhentile, Maradona ka dhënë edhe një intervistë për Inter Channel. “Para se gjithash falënderoj Masimo Moratin, që në Itali është padyshim presidenti im. Është një njeriu që e ka çuar lart Interin, ndërsa në verë mori edhe Murinjon, që mendoj se do ta merrja edhe unë nëse do të isha presidenti i një klubi. Ishte blerja më e mirë e mundshme, ia thashë këtë edhe Moratit kur e takova. Hoze ka gjithçka, di të flasë me lojtarët, me shtypin, në dhomat e zhveshjes, është më i miri”, tha Maradona. Por, respekti më i veçantë është ruajtur për presidentin Morati. “Me gjithë respektin që kam për tifozët napoletanë, që kanë qenë dhe janë në zemrën time, besoj se me Moratin president do të kisha shkuar tek Interi”. Më mirë jeta si futbollist apo si trajner? “Për mua, të stërvis nuk është problem. Askush nuk mund të harrojë historinë time, ta fshijë atë”, përfundoi Diego.

Inter-Barcelona, ka duel për David Vijën

Andi Bega — Sun, 11 Jan 2009 13:45:14 +0000

Presidenti i Valencia, Visente Soriano, posedon një kualitet jo të zakonshëm në botën e futbollit koherent. Numri një i klubit, që në fillim të vitit konfirmoi se xhevahiret e tij, Vija e Silva, mbi të gjithë, janë në shitje, por do ta lënë “Mestajën” vetëm në rast të ofertave marramendëse. Me kalimin kohëve, “gjuetia valenciane” është shtyrë për momentin për në qershor, ngaqë oferta e Barcelonës për Vijën (35 milionë euro, nuk konsiderohet e mjaftueshme…) është refuzuar. Numrat: Valencia kërkon 50 milionë për Vijën dhe 30 për Silvan, shifra jo shumë të logjikshme, por klubet më të mëdhenj evropianë qëndrojnë në dritare, sepse bëhet fjalë vërtet për talente të jashtëzakonshëm. David Vija, në veçanti, është një sulmues që ka demonstruar se di të shënojë gola në çfarëdolloj situate. Ishin pikërisht golat e tij, që vitin e kaluar e çuan Valencian e goditur nga kriza drejt fitimit të Kupës së Mbretit. Në total, Vija ka shënuar 86 gola me bluzën e Valencias në 144 ndeshje, një bilanc i mrekullueshëm, nëse i shtojmë edhe 24 golat me bluzën e Kombëtares (në 41 ndeshje). Një bomber i besueshëm, me eksperiencë ndërkombëtare dhe shumë dëshirë për të luajtur në Champions League. Interi e dëshiron shumë, por do të duhet të ruhet nga konkurrenca e ashpër e Barcelonës, por edhe e Realit të Madridit.

Del Piero: Inter, do të arrijmë!

admin — Sat, 10 Jan 2009 14:21:36 +0000

Alesandro del Piero këmbëngul se Juventusi është i motivuar dhe i gatshëm të garojë deri në fund me Interin për titullin kampion. Gjithsesi, kapiteni pranoi se “triumfi në Ligën e Kampioneve është i veçantë”. Pas ndërprerjes dimërore, skuadra e Ranierit do të kthehet gjatë fundjavës në aksion, ku udhëton në fushën e Sienës. “Besojmë se mund ta arrijmë Interin”, deklaroi Del Piero. “Kemi potencialin e duhur për të luftuar deri në fund dhe mendoj se tani ka ardhur koha që të shtyjmë në maksimum, pasi mund ta ngushtojmë diferencën”. Juventusi është mes 16 skuadrave të kualifikuara në Champions, ku do të përballet me Çelsin dhe portieri Xhixhi Bufon mendon se triumfi evropian nuk mund të krahasohet me atë në kampionat. “Jam dakord, pohoi Del Piero. Nëse do të mund të zgjidhja, padyshim që do të preferoja të fitonim Ligën e Kampioneve. Çelsi? Mund t‘ia dalim”.

Masimo Morati: Gjyqtarët? Gabime të paqëllimshme

admin — Tue, 23 Dec 2008 14:30:57 +0000

Masimo Morati i kundërpërgjigjet të gjithë atyre që sulmuan Interin se po favorizohet nga gjyqtarët. Shkak u bë goli i dytë i Maikon, i cili ishte në pozicion të dukshëm jashtë loje, që i dha zikaltërve fitoren në fushën e Sienës. “Episodi në ndeshjen me Sienën ishte një aksident i paqëllimshëm, tërësisht i ndryshëm nga ato që ndodhnin disa vjet më parë”, deklaroi njëshi i Interit. “Të gjithë e pranuan se goli ishte në pozicion të parregullt, sinqerisht që nuk e kuptoj se çfarë mund të themi më tepër”. Nga i akuzuar, Morati kalon në akuzues dhe “shigjeton” Juventusin, rivalen historike në Serinë A: “Gabim të ngjashëm të gjyqtarit kishte edhe në ndeshjen e Juventusit”. Më tej presidenti i kampionëve të Italisë foli edhe për 2008-ën: “Ishte një vit i madh për ne. Fituam me meritë titullin dhe po me kaq meritë kryesojmë kampionatin. Shpresoj vetëm që këto suksese të përsëriten edhe në arenën ndërkombëtare. Ndeshja me Mançester Junajted do të jetë shumë tërheqëse, ndërsa në Serinë A do të luftojmë deri në fund me Milanin dhe Juventusin. Më të mirët e sezonit zikaltër? Ibrahimoviç e Murinjo, por mos të harrojmë as Kambiason, Kordobën, Samuel dhe Kruz”.