Lajme Online Shqip » Sport

Qato, në ring për të mbrojtur titullin e kampionit në WBF

Andi Bega — Sun, 02 May 2010 17:01:18 +0000

Boks

Boksi i rëndësishëm zbret sot në Tiranë. Natyrisht që dueli më i spikatur i mbrëmjes është ai ku Kreshnik Qato do të mbrojë titullin e kampionit të botës në versionin WBF. Në orën 20.00, në ring përballë kampionit shqiptar do të jetë sfidanti argjentinas, Valdemar Ponce (16 fitore, 4 humbje dhe një barazim). Qato duket i favorizuar në këtë përballje, jo vetëm prej faktit sepse ka më shumë eksperiencë, por edhe sepse kundërshtari i tij nuk ka zhvilluar asnjëherë një duel prej 12 raundesh, ashtu si parashikohet në sfidat për titujt botërorë. Pas përgatitjeve njëmujore në Francë, gjatë peshimit zyrtar të boksierëve gjatë pasdites së djeshme, 32-vjeçari nga Durrësi është shfaqur në formë për të mbrojtur për herë të katërt brezin e kampionit. Qato e ka fituar titullin në WBF në prill të vitit 2008, ndërsa është i pamposhtur gjatë katër viteve të fundit, duke regjistruar 14 fitore radhazi. Mbrëmja në pallatin e sportit “Asllan Rusi” do të nisë prej orës 18.00, ku do të zhvillohen edhe tri duele të tjera. Përveç sfidës së boksierit kosovar, Shpëtim Shala, me kroatin Josip Jalushiç, në program është edhe një përballje për titullin WBF International në kategorinë e rëndë, ku do të ndeshen hungarezët Laszlo Hubert e Zoltan Beres. Gjithashtu do të zhvillohet edhe një duel femrash, ku australiania Laura Saperstein do të përballet me rumunen Daniela David.

Kuzhe “jo” D. Zagrebit “Qëndroj me Shqipërinë”

Andi Bega — Sun, 02 May 2010 16:59:31 +0000

Trajneri kuqezi, dje në Itali për Edgar Canin

Shqipëria vazhdon të mbetet zgjedhja e parë e Josip Kuzhe. Trajneri kuqezi ka refuzuar një ofertë konkrete që presidenti i Dinamos së Zagrebit, Zdravko Mamiç, i ka bërë për të marrë drejtimin e klubit të mirënjohur kroat. Vetëm pak ditë më parë, mediat në Kroaci konfirmonin se Josip Kuzhe ishte një prej alternativave për të marrë drejtimin e stolit të Dinamos së Zagrebit. Emri i drejtuesit të stolit të Kombëtares shqiptare, së bashku me disa trajnerë të tjerë (Nikola Jurçeviç, Igor Pamiç e Niko Kovaç sa për të përmendur disa) cilësoheshin si pasardhësit e mundshëm të Kruno Jurçiç. Tashmë Kuzhe ka zbuluar se është kontaktuar personalisht nga kreu i Dinamos së Zagrebit, megjithatë ai nuk ka preferuar të lejë përgjysmë punën e nisur me përfaqësuesen shqiptare. “Jam një kandidat për postin e trajnerit te Dinamo? Jo. Në një bisedë që kam zhvilluar së fundmi me presidentin e këtij klubi, Zdravko Mamiç, i kam thënë se nuk ekziston asnjë mundësi që të kthehem brenda një kohe të shkurtër te Dinamo”, janë fjalët e teknikut 57-vjeçar. Ai është një personazh mjaft i njohur te Dinamo e Zagrebit dje një prej trajnerëve më të dashur të tifozëve. Në karrierën si futbollist, ai ka luajtur me “blutë” nga viti 1971 deri më 1981, ku në 384 ndeshje si mbrojtës ka realizuar 14 gola. Si trajner, në periudhën 1986-’88, Kuzhe ka punuar me të rinjtë te Dinamo, ndërsa për dy sezone (1989-’91) drejtoi skuadrën e parë. Në vitin 2005 u kthye në krye të stolit të ekipit nga Zagrebi, duke fituar titullin kampion që prej sezonit të parë, por u largua në nëntor të 2006-s, si rrjedhojë e eliminimit nga Arsenali në turin eliminator të Champions League, edhe pse skuadra ishte konkurrente për titullin në Kroaci.

Momentalisht Josip Kuzhe mendon vetëm për Shqipërinë. Ai shtoi: “Për momentin më intereson vetëm të vazhdoj punën si trajner i Kombëtares shqiptare. Jam i kënaqur nga ajo që kemi bërë deri më tani, kam arritur të krijoj një atmosferë të mirë në ekip. Ndodhemi në një grup të vështirë dhe po punojmë për miqësoret e radhës përballë Malit të Zi dhe Andorrës. Po përgatitemi për të kompletuar skuadrën për eliminatoret e Euro 2012, ku synojmë që të afrojmë disa elementë të rinj në kontingjent”. Në fakt, për një mision të tillë, gjatë ditës së djeshme trajneri ka qenë i pranishëm në stadiumin “Leonardo Garili”, për të ndjekur sfidën e Serisë B, ku Piaçenca barazoi 1-1 me Viçencën. I vëzhguari special i Kuzhesë ishte sulmuesi Edgar Cani, i cili e nisi takimin si titullar. Sulmuesi, njëri prej kandidatëve për një fanellë kuqezi, ishte protagonist në aksionin e avantazhit të vendasve. 20-vjeçari, që deri më tani ka realizuar pesë gola në kampionat, u zëvendësua në minutën e 79-të të ndeshjes.

Murinjo: Dua një përforcim

Andi Bega — Thu, 07 Jan 2010 16:37:18 +0000

Zikaltrit fitojnë mes polemikave me Kievon. Baloteli, akuza tifozëve veronezë.
Interi e nis vitin 2010 me fitore dhe shpallet kampione e dimrit në Serinë A italiane. Zikaltrit fituan 1-0 në fushën e Kievos falë një goli të Mario Balotelit në minutën e 12. Kur mbetet edhe një ndeshje për t’u luajtur nga faza e parë, skuadra e Zhoze Murinjos ka grumbulluar 42 pikë. Takimi, i cili hapi javën e 18 të kampionatit, është luajtur në orën 12.30. Një orar që Liga Italiane e Futbollit e ka justifikuar me afrimin e publikut aziatik: por, duke parë mënyrën sesi rrodhi loja, do të ishte më mirë që imazhet mos të kishin arritur asnjëherë në këtë kontinent.

Fusha, në kushte jashtëzakonisht të këqija në stadiumin “Bentegodi”, ua ka vështirësuar punën dy skuadrave. Rrallë mund të shihje dy pasime radhazi dhe në përgjithësi ndeshja kishte shumë faulle, thyerje dhe aspak spektakolare. I vetmi që i ka dhënë pak cilësi përballjes ishte holandezi Shnajder me manovrat e tij. Një sfidë e tillë mund të përcaktohej vetëm nga një episod: rasti më i mirë u paraqit në formën e një kundërsulmi të shpejtë të Interit, kur kronometri tregonte 12 minuta lojë. Pas një kontakti në zonën zikaltër, ku kapiteni i Kievos, Pelisier pretendonte 11-metërsh, të besuarit e Murinjos dolën shpejt në sulm me treshen Milito-Pandev-Shnajder, duke nxjerrë Balotelin të lirë përballë Sorrentinos: gjuajtja e parë u grushtua nga portieri vendas, ndërsa tentativa e dytë e sulmuesit të talentuar me pasaportë italiane përfundoi në rrjetë.

Pas golit që zhbllokoi rezultatin, ndeshja u karakterizua nga kartonët e shumtë (gjashtë për Interin dhe tri për Kievon), një tjetër pretendim i vendasve për një penallti të paakorduar nga gjyqtari Pierpaoli në minutat shtesë, por edhe nga momentet e frikës, pas një dëmtimi në kokë të Kristian Kivut. Rumuni u dërgua menjëherë në spitalin e Veronës, ku iu nënshtrua një ndërhyrjeje kirurgjikale. Sipas stafit mjekësor të zikaltërve, operacioni ishte i domosdoshëm për të mbyllur frakturën në kafkën e lojtarit.

Në sfidën e luajtur dje, mund të veçohen edhe debutimi i Arnautoviç me Interin në Serinë A dhe lamtumira e Patrik Vieirasë, i cili përshëndeti shokët e skuadrës dhe tifozët, pasi sipas të gjitha gjasave do ta vazhdojë karrierën te Mançester Siti i Roberto Mançinit. Largimi i mesfushorit francez u konfirmua nga Murinjo, i cili deklaroi se skuadrës i nevojitet edhe një përforcim. “Jam i lumtur, ndeshjet e fituara në këtë mënyrë janë ato që i dhurojnë trajnerit buzëqeshjen. Skuadra paraqiti karakterin e saj në fushë: në futboll, diferenca bëhet nga personaliteti i lojtarëve dhe sot ishim perfektë”, deklaroi tekniku luzitan.

“Përpara kësaj sfide kishim probleme me kontingjentin dhe morëm pikët maksimale falë grintës që shfaqëm. Vieira? Ai zhvilloi një ndeshje të jashtëzakonshme. Nuk mund të na dhuronte një lamtumirë më të mirë se kjo. I uroj fat në aventurën e tij të re dhe mund të them se do të më mungojë një lojtar i tillë. Për mendimin tim, Patrik do të luajë në Angli. Më mungon një lojtar në mesin e fushës, por nuk kam të drejtë t’i kërkoj asgjë klubit. Bëj maksimumin me lojtarët që kam në dispozicion. Faulli me dorë i Kuarezmës në të 95-n në zonë? Jo, m’u duk sikur topin e preku me kokë Jepes…”. Të gjithave këtyre i shtohet edhe zemërimi i Balotelit, që në fund të ndeshjes ka akuzuar publikun veronez. “Tifozët në Verona ma shpifin sa herë që luaj në këtë stadium”, tha sulmuesi, duke iu referuar kontestimeve të vazhdueshme.

Franca: “Adieu” Domenek, nis gjuetia për pasardhësin

Andi Bega — Thu, 07 Jan 2010 16:34:52 +0000

Alen Bogosian, Laurent Blank, Didie Deshamp, Zhan Tigana. Katër trajnerë në listën për vendin e Domenek. Këto kanë qenë fjalët e Zhan Pierr Eskalete, presidenti i Federatës Franceze të Futbollit, i cili ka konfirmuar synimin për të mos rinovuar besimin për trajnerin aktual të Kombëtares transalpine. “E di shumë mirë që duhet të vendos para qershorit, sigurisht para botërorit, për të respektuar edhe klubin që do të humbasë trajnerin e saj”. Këto ishin fjalë shumë të qarta të Eskaletes, i cili fshin çdo dyshim mbi divorcin e garantuar mes Francës e Domenekut. Katër janë emrat favoritë. “Alen Bogosian do të ishte një mbështetje perfekte për ‘Bleus’-at”, rrëfehet presidenti i FFF-së. Fjalë të admirueshme Eskalete ka thënë edhe për Laurent Blank dhe Didier Deshamp. Një tjetër emër mes favoritëve është edhe ai i Zhan Tigana, për të cilin “flet vetë historia”.

Portugali, Benfika kërkon Ronaldinjon

Andi Bega — Thu, 07 Jan 2010 16:31:35 +0000

Ylli i Milanit, Ronaldinjo, është objektivi i merkatos së portugezëve të Benfikës, bëri të ditur dje “Corriere dello Sport”. Sipas kësaj të fundit, ish-milanisti Rui Kosta, drejtor i përgjithshëm aktualisht te Benfika, dëshiron me çdo kusht marrjen e Dinjos. Thuhet se trajneri Horge Jesus është shok shumë i mirë i vëllait të Ronaldinjos, Roberto de Assis, dhe po negociojnë bashkë prej kohësh. Sidoqoftë, një transferim i Ronaldinjos nuk pritet të ndodhë, pasi ai fiton 6.5 milionë euro te Milani dhe këtë pagë nuk ia ofron dot Benfika.

Mançini: Tifozët e Junajtid do pendohen sa të jenë gjallë

Andi Bega — Thu, 07 Jan 2010 16:16:56 +0000

Sheiku Mansur mendon për shlyerjen e borxhit prej 92.6 milionë sterlinash për vitin 2009

Trajneri i ri i Mançester Sitit, Mançester Sit, dëshiron të shmangë konfliktet me Sër Aleks Fergusonin, por, nga ana tjetër, ka sulmuar direkt tifozët e Mançester Junajtid. Sa herë që përballen Mançester Siti dhe Mançester Junajtid, tifozët e “Djajve të Kuq” vendosin një pankartë të madhe, në të cilin shkruhet numri i viteve që nga koha kur Siti ka fituar trofeun e fundit dhe për këtë Mançini shprehet: “Do t’i bëj tifozët e Junajtid të pendohen sa të jenë gjallë për atë pankartë që kanë vendosur.

Nuk do të kalojë kohë e gjatë dhe do të shikojnë “me gisht në gojë”, kur ne të triumfojmë. Pas transferimit të Karlos Tevez nga Junajtid te Siti, tifozët e Sitit kishin vendosur një pankartë të madhe në qendër të qytetit, ku shkruhej: “Mirë se erdhe në Mançester”, gjë që e irritoi jashtë mase Fergusonin, i cili e përkufizoi Sitin si “klub i vogël pa mentalitet”. Ferguson bëri shaka kohë më parë, duke thënë se Mançini do të jetë vetëm pasuesi i Hughes dhe se së shpejti do të largohet. “Është normale, sqaroi më tej Mançini. Është shaka ajo çfarë tha ai, por tani shpresoj të qëndroj sa më shumë. Shpresoj të qëndroj këtu sa më shumë që të jetë e mundur. A më ka kontaktuar Sër Aleks? Jo, sepse nuk e ka numrin tim.

Por ai është njeri i mirë. Kam respekt të madh për të. Sër Aleks fitoi shumë trofe dhe është trajneri më i mirë në botë. Por unë do ta mposht, kjo është normale. Nuk luajmë për të humbur. Kemi respekt, por do ta mposhtim Sër Aleksin dhe Junajtidin e tij”, tha në fund Mançini. Pronari arab i Sitit ka menduar të sheshojë një tjetër problem, atë të borxheve të klubit. 92.6 milionë sterlina, baras me rreth 103 milionë euro: kaq ishte borxhi i klubit për të mbyllur 2009-n, bilanci i dytë më i keq në historinë e Premier League, pak më e vogël se “vrima e zezë” e Çelsit prej 140 milionë sterlinash në sezonin 2004-‘05.

Por e gjithë shuma bashkë me blerjet e verës kap shifrën e 305 milionë sterlinave, të cilat i ka shlyer të gjitha sheiku Mansur, madje duke paralajmëruar edhe investime të tjera në shifrën 90 milionë. Padroni i Sitit ndoqi rrugën e Roman Abramoviçit, që në fund të dhjetorit shleu borxhet e Çelsit prej “vetëm” 44 milionë sterlinash.

Timparano firmos një vit me Dinamon

Andi Bega — Thu, 07 Jan 2010 15:59:10 +0000

Pasi mbylli me sukses vitin 2009, duke u renditur në vendin e parë dhe me një diferencë të theksuar nga ndjekësit më të afërt, Dinamo, duket se do të dominojë edhe merkaton e dimrit. Blutë e kryeqytetit janë të parët që kanë lëvizur në këtë fillimviti dhe përveç se kanë nënshkruar marrëveshjet e para si ajo me sulmuesin argjentinas Maksimiliano Timpanaro, janë pranë goditjeve të mëdha në këtë merkato. Timparano firmosi për një vit me Dinamon. Kontrata e huazimit të 21-vjeçarit nga Velez Sarsifield me blutë kryeqytetas skadon më 30 dhjetor 2010. Lajmi u bë i ditur zyrtarisht nga klubi blu. Timparano, i cili në karrierën e tij ka luajtur edhe me Çakarita, bëhet kështu argjentinasi i katërt në radhët e kryesuesve të Kategorisë Superiore, pas Rafael Sozës (4 gola), Lukas Malarkanes (2 gola) dhe Nikolas del Monte. Ndërkohë që në shënjestër janë edhe Emiliano Vila, Elvin Beqiri dhe në provë te Dinamo janë sulmuesi Semiran Çela (21 vjeç) dhe mbrojtësi i majtë serb Vladimir Jovanoviç (23 vjeç).

Superiorja, kampionati i 65 në botë

Andi Bega — Thu, 07 Jan 2010 15:50:25 +0000

Kategoria Superiore renditet në vendin e 65 mes 100 ligave më të forta në botë. Kampionati elitar në vendin tonë ka 289 pikë në klasifikimin e vitit 2009 të Institutit Ndërkombëtar të Historisë dhe Statistikave të Futbollit (IFFHS), po aq sa edhe Liga qipriote, e cila ndodhet një vend më poshtë. Ecuria e kampionatit shqiptar në këtë renditje ka ardhur në rënie gjatë gjithë vitit 2009, që në mars pozicionohej e 56-a, ndërsa në gusht e 62-a. Për t’u theksuar është fakti se Superiorja është lënë mbrapa nga kampionatet e Iranit, Zambias, Sudani, Libia, Siria, Hondurasi e Tajlanda, ndërsa mund të ngushëllohemi me faktin se Letonia, Finlanda, Kina dhe Islanda kanë kampionate më të dobëta. Në një krahasim me ligat ballkanase, Shqipëria mban vendin e tretë nga fundi. Turqia në vendin e 10 është e para, pas saj vijnë Rumania (11), Greqia (13), Bullgaria (35), Serbia (36), Kroacia (37), Sllovakia (38) dhe Sllovenia (61). Pas Shqipërisë ndodhen vetëm Maqedonia (në vendin e 79) dhe Bosnjë-Hercegovina (100). Renditja e IFFHS-së organizohet prej vitit 1991 dhe ajo bazohet në rezultatet e aktiviteteve kombëtare dhe ndërkombëtare të klubeve. Anglia është konfirmuar si kampionati më i fortë në botë edhe për vitin 2009, por diferenca e Premiershipit me ndjekësit është ngushtuar në krahasim me 12 muaj më parë. La Liga spanjolle dhe Bundesliga gjermane kanë shfaqur ngritje të nivelit, e tashmë ato mbajnë vendet 2 dhe 3 në klasifikim. Seria A braziliane ndodhet e katërta, përpara Serisë A italiane dhe Ligës 1 franceze, ndërsa pas tyre renditen Argjentina, Holanda dhe Ukraina.

Dinamo, Plaku jashtë fazës përgatitore

Andi Bega — Thu, 07 Jan 2010 15:11:03 +0000

Rrugët e Sebino Plakut dhe Dinamos duket se janë ndarë përfundimisht. Drejtuesit e klubit blu kanë vendosur ta lenë sulmuesin jashtë kontingjentit që ka udhëtuar në Turqi, për të zhvilluar fazën përgatitore. Burime pranë kryesuesve pohuan që Plaku nuk udhëtoi me ekipin, ndërsa pritet që ai të gjejë një skuadër të re për të luajtur në pjesën e mbetur të sezonit. Interes për shërbimet e 24-vjeçarit ka shprehur Tirana, që kërkon një partner të fortë në repartin ofensiv për Migen Memellin. Ndërsa në rast se pogradecari zgjedh ta vazhdojë karrierën jashtë vendit, Plaku do të jetë sulmuesi kryesor i bardhebluve. Dinamo do të stërvitet me intensitet të plotë për afro 12 ditë në Turqi, për t’u kthyer më 17 janar, vetëm një javë përpara derbit me Tiranën. Të hënën me skuadrën pritet të bashkohen edhe kapiteni Arjan Pisha, mesfushori Gentian Muça, sulmuesi Elis Bakaj dhe mesfushori i Kombëtares, Emiliano Vila, i afruar në formë huazimi nga Dinamo e Zagrebit.

Messi “rremben” gjithcka brenda 1 viti

Andi Bega — Mon, 21 Dec 2009 16:06:36 +0000

Nje vit te tille, Lionel Messi as mund ta kishte enderruar. Sulmuesi argjentinas i Barcelones ka fituar gjithcka qe mund te fitohet ne nje vit dhe rekordin e tij do jete shume e veshtire qe ta thyejne lojtare te tjere ne te ardhmen. Me Kupen e Botes te fituar te shtunen, Barcelona siguroi edhe trofeun e gjashte brenda nje viti, ndersa Messi ka arritur te rrembeje si Topin e Arte ashtu edhe cmimin e lojtarit me te mire te FIFA-s.

Per Fifa World Player, ai eshte ne gare bashke me Cristiano Ronaldo-s e Xavi-n, por tashme “pleshti” thjesht duhet ta zyrtarizoje marrjen e ketij trofeu. Vendimi do merret sot ne darke dhe te gjitha mediat e cilesojne nje formalitet.

“Nuk ndihem me i miri ne bote. Kam shume fat pasi luaj ne nje skuader te madhe. Nuk ndihem me i miri sepse me e mira eshte Barcelona. Une mendoj vetem per grupin sepse pa ate nuk do kisha fituar asgje”, thekson lojtari.